අපිට පුරුදු 'නෑ බොරු' කියලා......!

දෙවන පදවි ප්‍රාප්තිය හෙවත් ගෙදරට මරගාතේ

ජනාධිපති මහින්ද රාජපක්ෂ මහතාගේ දෙවන ධූර කාලය නොවැම්බර් 19 වනදා ආරම්භ විය. ඒ නිමිති කොට පැවැත්වුනු  රාජ්‍ය උත්සවය සඳහා රජය රු. මිලියන 200 ක් වැය කරන ලද බව වාර්තා විය. ඊට අමතරව සියලුම රාජ්‍ය ආයතන වෙන් වෙන් වශයෙන් අති විශාල මුදල් ප්‍රමාණයක් වැය කළ බව සතියක් පුරා පැවැත්වූ සැණකෙළි හා සංදර්ශනවලින් පැහැදිලි විය. බොහෝ අමාත්‍යාංශවල විදුලි බුබුලින් සරසා උත්සව සිරි ගන්වා තිබූ අතර සර්ව රාත්‍රික පිරිත් හා දාන මාන සත්කාරක සේවා ද ඒවායේ පැවැත්වීය. ඉකුත් වසරේ මැයි 18 වන දා ඇරඹි මහපාරේ කිරිබත් කෑම නොවැම්බර් 18 වන දා නැවත දැකිය හැකි විය. මෙදා පාර පාරේ කිරිබත් කෑමට අමතරව නිදහස් චතුරශ්‍රයේ ද ලෝකයේ ලොකුම කිරිබත දේශමාන්‍ය පබිලිස් සිල්වා මහතා අතින් පිසින ලදුව මැති ඇමතිවරු ද ඔවුන්ගේ අඹු සිඟිත්තෝ ද රස බලන අයුරු දැක ගත හැකි විය.එකී කිරිබත ගිනස් වාර්තා ‍‍පොතට ඇතුලත් කෙරෙන බව අසන්නට ලැබීම තවත් ආශ්චර්යයකි.

            මිනිත්තු 11 ක් තුළ පැල එකළොස් ලක්ෂයක් සිටුවීම මෙම උත්සව මාලාව තුළ රජය විසින් ඉටුකළ වැදගත් කටයුත්තකි. අගතිගාමිත්වයෙන් තොරව අප එසේ කියන්නේ රුක් රෝපණ වැඩ සටහන දියත් කර තිබූ ආකාරය අනුව අවම වශයෙන් හෝ පැල ලක්ෂ එකොළහෙන් පැල ලක්ෂ තුනක්වත් පැලවේ යැයි උපකල්පනය කිරිමෙනි. මහින්ද රාජපක්ෂ ජනාධිපතිවරයාගේ ප්‍රථම ධුරකාලය තුළ ගත වූ  වසර හයේ දී ලංකාවේ වන ගහනයෙන් හෙක්ටයාර්  දස දහස් ගණනක් රජයේ සෘජු මැදහත් වීමෙන් රටට අහිමි කර තිබේ. සිදුකර ඇති වන විනාශය හා එයින් දැනටමත් මතු වෙමින් පවතින අලි-මිනිස් ගැටුම් හා පාරිසරික තුලනය බිඳ වැටීම ගැන සැලකිල්ල යොමු කරනවිට මෙම රුක් රෝපණ වැඩසටහන ඊට යන්තමින්වත් හිලව් නොවන බව පැහැදිලිය. එහෙත් කෝටි 52 ක් වියදම් කල ‘අයිෆා’ සහ කෝටියක් වියදම් කළ නිවාස ඇමතිගේ ‘තුන් කල් දැක්ම’ වැනි මහජන මුදල් කාබාසිනියා කළ ව්‍යාපෘති සමඟ සන්සන්දනය කළ විට මෙය යහපත් එකකි.එයට වැය කළ මුදල ලක්ෂ 200 න් කවර පංගුවක් දැයි තවමත් ප්‍රසිද්ධියට පත්ව නැත.

            

රජය වන විනාශයට දායක වී ඇති අන්දම පැහැදිලි කර ගත හැකි තොරතුරු කීපයක ජනතා‍වගේ දැන ගැනීම පිණිස ඉදිරිපත් කරන්නේ නම් හම්බන්තොට උඩමත්තල ගුවන් තොටුපල ව්‍යාපෘතිය සඳහා වනාන්තරය  ඉවත් කිරීම හෙක්ටයාර් 2000කි. මොරගහකන්ද මෙගා ව්‍යාපෘතියට හෙක්ටයාර් 1000කි. විල්පත්තු ජාතික වනෝද්‍යානය මැදින් කි.මී.60ක මහා මාර්ගයක් කැපීමෙන් හෙක්ටයාර් සිය ගණනකි. සෝමාවතී අභය භූමිය මැදින් සේරුවිල මාර්ගය කැපීමට හෙක්ටයාර් සිය ගණනකි. දුම්බර මිටියාවතේ කැලෑ ඉඩම් ගොඩ කිරීම, නකල්ස් රක්ෂිතයේ හෝටලයක් ඉදි කිරීම, කෝකිලායි කලපුව දෙපස රක්ෂිතය එළි කිරීම, මින්නේරිය අභය භූමිය තුළ හෝටල් දෙකක් ඉදි කිරීම, දැයට කිරුල ප්‍රදර්ශනයට සමගාමීව මොණරාගල දිස්ත්‍රික්කයෙන් විවිධ ව්‍යාපෘති සඳහා ඉවත්කළ වනබිම් ආදිය සඳහන් කළ හැකිය. මහජන මුදල් නාස්ති කරන ප්‍රචාරකවාදී රුක් රෝපණ ව්‍යාපෘති වෙනුවට රට පුරා සිදු කෙරෙන වනාන්තර මංකොල්ලය නැවැත්වීමට තීන්දුවක් ගැනීමට පාලකයින්ට බුද්ධිය පහළ වෙන්නේ නම් වඩා යහපත්ය.

            ඇමරිකානු ඩොලර් මිලියන 360 ක් වැයකොට ඉදිකරන හම්බන්තොට වරායේ ප්‍රථම අදියර ලෙස කරගම් ලේවායේ හෙක්ටයාර් 43 ක භූමියේ චයිනා හාබර් ඉංජිනියරින් සමාගම ඉදිකල තටාංගනය දෙවන පදවි ප්‍රාප්තියට සමගාමීව සිදුකෙරිණි. රාජ්‍ය මාධ්‍ය පවසන අන්දමට දැන් ලෝක සිතියමෙහි හම්බන්තොට ජාත්‍යන්තර වරාය ඉදි වී තිබේ. මෙතැන් පටන් එය මෙරටට විදේශ විනිමය ගලන මහා උල්පත වනු ඇත. එ‍හෙත් සත්‍ය ලෙසම සිදු වූයේ කොළඹින් සේරුවිල නෞකවට පටවන ලද භාණ්ඩ කිහිපයක් හම්බන්තොටට ගොඩ බා නැවත ලොරි මඟින් කොළඹට ගෙන ඒමත් ටැන්ජරීන් මගී නැව කුලියට ගෙන හම්බන්තොටට ට්‍රිප් එකක් යාමත් පමණි. වරායේ මූලික අදියරේ කටයුතු අවසන් කරන්නට තවත් කාලයක් ගතවනු ඇත. එහෙත් මේ සිදු වන්නේ මැතිවරණ කාල සටහනට අනුව යුද්ධය මෙහෙය වූවාසේ ප්‍රචාරකවාදී ඉලක්ක සම්පූර්ණ කර ගනු පිණිස සිදුකරන කඩිමුඩි වැඩය. ඒවා කරදියවර මංගල්‍යය මෙන්ම ජනතාවට හාස්‍යය උත්පාදනය කරවන්නේය.

            දෙවන පදවි ප්‍රාප්තිය හේතුවෙන් දින ගණනාවක් කොළඹ කලාප කිහිපයක පාසල් වසා දැමීය. එම පාසල්වල මේ දිනවල පැවැත්වියයුතු අවසාන වාර විභාගය නැවතත් සංවිධානය කිරීමට සිදුවේ. පාරවල් වසා දැමීමෙන් එදිනෙදා කටයුතු අවුල් වී තිබිණ. නොවැම්බර් 10 දින ඇති වූ ගංවතුරෙන් උන් හිටි තැන් යටවීම නිසා පීඩාවට පත් ජනයා සම්බන්ධ කතාන්දරය ද දේශපාලනඥයන්ට මුළුමනින්ම අමතක වී ගියේය.ජිවන බර දැඩි ලෙස පොකැට්ටුවට දැනෙද්දී මිනිස්සු නිහඬව සිටිති. අසල්වැසියා සමඟ හෝ කතා නොකරන නිර්වින්දනයක ගිලී සිටිති. සියල්ල යහපත් අයුරින් සිදු වෙමින් පවතින්නේ යැයි පාලකයින් සිතා සිටින බව පෙනේ. අවසාන විග්‍රහයේ දී රැවටෙන්නේ කවුදැයි මැන ගැනීමට යම් අදහසක්දෙවන පදවි ප්‍රාප්තිය දවසේ රජයේ ‘දිනමිණ’ පුවත්පත කෙරෙහි අවධානය යොමු කිරීමෙන් වටහා ගත හැකිය. රු.20ක් මිළ නියමකර ඇති දිනමිණේ නොවැ. 19 දින පිටු සංඛ්‍යාව 104කි. ජනපතිට සුභ පතා පළ කර ඇති සම්පූර්ණ පිටුවේ දැන්වීම් ප්‍රමාණය 73 කි. එයින් 15 ක් පෞද්ගලික අංශයේ දැන්වීම්ය. ඉතිරි දැන්වීම් පිටු 58 පළකර තිබෙන්නේ රජයේ අමාත්‍යාංශ විසිනි. බුද්ධ ශාසන, සංස්කාතික, උසස් අධ්‍යාපන, නිවාස වැනි බංකොලොත් ආර්ථිකතාවයක පවතින අමාත්‍යාංශ ජනපතිට ආවැඩීමේ දී ඉදිරියෙන්ම සිටිති. සුබ පතන පෞද්ගලික අංශයේ ආයතන15 ද ඔවුන්ටම සම්බන්ධ ඒවා බව පැහැදිලිය. මේ කිසිදු කටයුත්තකට රටේ කවර තරාතිරමක හෝ ජනතාවගේ සහ සම්බන්ධතාවයක් නැති බව පෙනේ. 

සූදු පනත සම්මත කළේ එ.ජා.ප. යෙන් නම් විමල් වීරවංශ එයට විරෝධය පළකරන ආකාරයයි........ මේ.

දැන් මේ ඊයෙ පෙරේද මේ ආණ්ඩුව මොකක්ද කරල තියෙන්නෙ. පනතක් ගෙනාව සූදු කෙළින්න. ඒකට නමක් දැම්ම.. කැසිනෝ කියල... ඇයි සූදු කියල කියන්න බෑනෙ. කොහොම දැම්මත් මේ දෙකෙන්ම සිද්ධ වෙන්නෙ මේ රටේ අපේ ගම්වල අවුරුදු දහස් ගණනක් ආරක්ෂා කරගෙන, රැකගෙන ආපු නිර්මල සංස්කෘතිය අමු අමුවේ සංචාරක ව්‍යාපාරය නාමයෙන් සුද්දන් සඳහා පාවල දීල තියෙන එකයි. කැසිනෝ කියන්නේ මොකක්ද ආදරණීය අම්මේ, තාත්තේ ගමේ අපේ දුප්පත් එවුන්ට යන්න පුළුවන් තැනක් ද? නැහැ. සල්ලාල සල්ලි කාරයොයි....අධිරාජ්‍යවාදී සුද්දොයි ලකාවට ආපුවම උන්ට හිතේ හැටියට විනෝද වෙන්න තැනක තියෙන ක්‍රීඩාවක්. අපේ රටේ රීරි මාංශ උරාගෙන බීල අපේ දේපලයි සම්පතුයි කොල්ල කාගෙන ගිහිල්ල අපිව හප කරපු අපේ දේශියත්වය විනාශ කරපු රීල පුකවත් හෝදන්නේ නැති සුද්දන්ට හදපු තැනක්. සූදුව නිත්‍යානුකුල කළේ ඒකට. ගමේ අපේ කොල්ලෙක් මළ ගෙදරක නිදි මරන්න හරි බූරුව ගැහුවම ඌව අල්ලගෙන කුදලගෙන යනවා. දැන් මේ සුද්දෝ සූදු  කෙළින එකට මේ පරගැති ආණ්ඩුව අවසර දීලා. මේක අපරාධයක්. නිකං අපරාධයක් නෙවෙයි. සහගහන අපරාධයක්. සූදුව නීත්‍යානුකූල කරනවද කිසිම සදාචාරයක් තියෙන ආණ්ඩුවක්. අධිරාජ්‍යවාදීන්ට ගැතිකම් කරන උනුයි උන්ගෙ ගෝල බාලයනුයි දැන් මේක කරල. ප්‍රභාකරන් දැඟලුවෙත් අපේ ජාතිය මරල විනාශ කරන්න. ඒක කර ගන්න බැරි වුනා. දැන් ප්‍රභාකරන්ට මරල ඉවර කර ගන්න බැරි වෙච්ච වැඩේ මෙන්න ප්‍රභාකරන්ගේ මස්සිනාල ටික එකතු වෙලා අපේ ජාතියේ අධ්‍යාත්මය මරන්න පටන් අරගෙන. ඒ කියන්නේ මොකක්ද. අපිව වෙනත් විදියකින් විනාශ කරන්න. ඒක අපිව භෞතිකව විනාශ කරනවට වඩා භයානකයි. මේ ජාතිය දිහා ලෝකය මේ දක්වා බැලුවේ අපේ සාරධර්ම දිහා අපිට ලෝකෙටම නැවෙන්නේ නැතිව කොන්ද තියාගෙන ඉන්න පුළුවන් වුනේ ඒකෙ හයියෙන්. මේක කලාපවලට නියාමනය කරලලු පිහිටුවන්නෙ. මුට්ටිය දාල බලනවා. පස්සෙ තමයි අනිත් ඒවා සිද්ධ වෙන්නේ. යන්න බැංකොක්වලට, සිංගප්පූරුවට. යන්තම් වයස අවු. 15-16 පැනපු ගමන් හිරි ඔතප් බිඳ ගත්තු ගෑනු දරුවන් හොයා ගන්න පුළුවන්ද. බැහැ. ජේ.ආර් මේ රට සිංගප්පූරුවක් කරණව කිව්වම‍ අපි ඒකට මූලිකව එදා ජේ.වී.පී. විදියට විරුද්ධ වුනේ ඒ හින්දයි.

ජාතියේ නාමයෙන් මේ රටේ ජනතාවගෙන් අපි ඉල්ලා සිටින්නේ, ආදරණීය අම්මේ, තාත්තේ මේ උගුලට අහුවෙන්න එපා. මේකට විරුද්ධ වෙන්න. හෙට මේකෙ ගොදුර ඔබේ සුරතල් ආදරණීය කෙලි පැංචි කොලු පැංචා  වෙන්න පුළුවන්. අමුණුගම මහත්තය කියන්නෙ මොකක්ද වෙන රටවලත් එහෙමලු. දැන් වෙන රටවල්වල තියෙනව කියලා ඕනම කුණු ජරාවක්, තුවාලයක්, වනයක් මෙහෙට අරන් එන එකද කරන්න ඕන.. සල්ලිත් හම්බ‍ වෙනවලු.

               

ආදරණීය අම්මේ තාත්තේ මේ ජාතියේ සාරධර්ම රටේ ගෞරවය, අභිමානය සල්ලිවලට පාවා දෙන්න යනව නම්, ඒක තරම් මේ ජාතියට කරන නින්දාවක් මේ රටට කරන අවමානයක් තවත් තියෙනවද කියල අපි අහනව. අනිත් පැත්තෙන් අමුණුගමල කියන්නෙ කවුද? නව ලිබරල්වාදය ගැන යූ.ඇන්.පි. යේ න්‍යායචාර්යවරයා.

               

සුද්දො මේකේ තේ වගාව ආරම්භ කරල ඒකට අපිව සම්බන්ධ කරන්න හදනකොට අපේ ජාතියේ අභිමානය ඉතිහාසයේදී අපි රැක්කේ සල්ලිවලට සුද්දන්ගේ වතුවල වැඩ කිරීම ප්‍රතික්ෂේප කරමින්. දකුණු ඉංදියාවෙන් ඒ නිසා මිනිස්සු ගේන්න වුනා. දැන් මේ ජාතියේ පළමු පුරවැසියගෙ නායකත්වයෙන් හැදිල තියෙන ‘යළි පුබුදමු ශ්‍රී ලංකා’ මොකද කියන්නෙ. අපේ අභිමානය නොසලකා අපේ සාරධර්ම නොසලකා නීතිගත කරපු සුද්දන්ගේ සූදුවෙන් රටට සල්ලි ලබා ගන්නවලු. මං අහනව අපේ ජාතිය මේ තරම් ම පතුලට වට්ටන්න මේ අධිරාජ්‍ය ගැති පාලකයින්ට  පුළුවන් වුණේ කොහොමද කියල. G.S.P. අපි එපා කිව්වා. සුද්දගෙ කොන්දේසි වලට වඩා අපේ රැකියා නැති වුනත් අපේ ජාතියම බඩගින්නේ උන්නත් මේ යටත් වීම එපා කියලයි අපි කිව්වෙ. අපේ රැකියා ලක්ෂ 3 ක් විතර අවධානයේ තබා‍ගෙන අපි ඒ නොසැලෙන තීන්දුව ගත්ත නම් මේ රටේ ජාතිමාමක ජනතාවගෙන් මම අහන්නේ සුද්දෝ සූදු කෙළල අපේ රටට ලැබෙන තෝන් සල්ලි අපේ බඩගින්න නිවන්න ගන්නවද අපේ ජාතියේ අභිමානය පර සුද්දන්ට පාවල දීල ලැබෙන සල්ලිවලට යටත් වෙනවද? ආදරණීය අම්මේ, තාත්තේ සහෝදරිය සහෝදරය ඔබේම හෘද සාක්ෂියෙන් අහගන්න කාලයයි මේ. එසේ අසමින් මේ අසමජ්ජාති ක්‍රියාවට පළමුවත් විරුද්ධ වෙන්න. දෙවනුවත් විරුද්ධ වෙන්න. තෙවනුත් විරුද්ධ වෙන්න. ඒක මතු පරම්පරාවට අපේ පරම්පරාවෙන් දිය හැකි ලොකුම දායාදය විදියටයි අපි දකින්නෙ.

               

            සූදුවට ජයග්‍රහණය  !

         ජනතාවට විනාශය !   ආ...හ්..මට වැරදුණා.

         ජනතාවට ජයග්‍රහණය !

         සූදුවට විනාශය  !

එම්. ඒ. කේ. පෙරේරා.

පළාත් පාලන මැතිවරණ සංශෝධන යෝජනා

පළාත් පාලනය උදෙසා වූ යෝජනා සහිත කෙටුම්පතක් ඉදිරිපත් වී ඇත. එය බොහෝ තැන්වල විවේචනයට ලක් වී ඇති අතර එහි සුළු ජාතීන්ගේ නියෝජනය නොතකා හැරීම හා වෙනත් වෙනස්කම් ගැන ශ්‍රේෂ්ඨාධිකරණයෙන් තීන්දුවක් ඉල්ලීමේ යොමුවීමක් ද දැනට පවතී.

ලැයිස්තු ක්‍රමයක් 

කලක සිටම බෙහෙවින් විවාදයට ලක් වූ කරුණක් වූ සමානුපාතික නියෝජනය වෙනස් කොට කොට්ඨාශ ක්‍රමයට පැමිණීම ඉදිරි පියවරක් ලෙස සැලකිය හැකිය. එසේ වුව ද කොට්ඨාශ ක්‍රමයෙන් අපේක්ෂා කළ වඩා ප්‍රජාතන්ත්‍රවාදී නියෝජනය අහෝසි කොට සමානුපාතික ක්‍රමයට සමාන පදනමක් හඳුන්වා දී ඇත. සමානුපාතික ක්‍රමයේත්, කොට්ඨාශ ක්‍රමයේත් තිබුණු යම් බලවත් පක්ෂවලට හිතකර ලක්ෂණ පමණක් මිශ්‍රකොට හදා ගැනුණු ලැයිස්තු ක්‍රමයකි. පවතින පිළිකුල් සහගත දේශපාලන පක්ෂ ක්‍රමයට පටහැනිව අලුත් දේශපාලන මතයක් දරන තනි පුද්ගලයෙකුට හෝ දෙතුන් දෙනෙකුට තරඟ කළ නොහැකිය. ඔවුන් අදාළ ලැයිස්තුවකින් ස්වාධීන ලෙස තරඟ කළ යුතුය. එහෙයින් තරඟ කිරීම ලැයිස්තුව මත පදනම් වේ. කොට්ඨාශයට නම් කරනු ලබන එක් අපේක්ෂකයෙකු බැගින් සමස්ත පළාත් පාලන ආයතනයටම නම් ලැයිස්තුවක් තිබිය යුතුය. සමානුපාතික නියෝජනය සඳහා වෙනම ලැයිස්තුවක් වේ. කොට්ඨාශ ක්‍රමයෙන් බලාපොරොත්තු වූ තනිව හෝ තරඟ කිරීමේ පුළුල් ඉඩකඩක් සමානුපාතික ක්‍රමයෙන් සැලසුණු සුළු පක්ෂ හෝ කණ්ඩායම් නියෝජනයට තිබුණු ඉඩකඩත් යන දෙකම මෙයින් තව දුරටත් සීමා වේ. තැන්පත් මුදල වැඩි කිරීමෙනුත් සමානුපාතික ක්‍රමයට ගණන් බැලෙන ආකාරයෙනුත් එය යළිත් සීමා වේ.

            කොට්ඨාශ නිර්ණය

කොට්ඨාශයකට එක් මන්ත්‍රීවරයා බැගින් පත්වීම තහවුරු කර ඇත. එහි දී පළාත් පාලනයට අදාළ කොට්ඨාශ ‍වෙන් කිරීම සිදුවන ආකාරයට අනුව, 18 වන සංශෝධනයෙන් කැටි කොට ගත් බලය, ප්‍රාදේශිය ලෙස ද තහවුරු කර ගැනීම මෙහි දී සිදුවේ. එනම් කොට්ඨාශ වෙන් කිරීම සම්බන්ධ පූර්ණ බලධරයා පළාත් පාලන ඇමතිවරයාය. (සංශෝධන පනත් කෙටුම්ප‍තේ 2 වගන්තිය) මේ අනුව එම කටයුත්ත සඳහා, පස් දෙනෙකුගෙන් යුත් ජාතික සීමා නිර්ණය කමිටුව පත් කරන්නේ ඇමතිවරයාය. 18 වන සංශෝධනයේ සඳහන් ජනාධිපති විසින් පත්කරනු ලබන සීමා නිර්ණය කොමිෂන් සභාව සමඟ සම්බන්ධයක් මෙහි දක්වා නැත. කොමිසන් සභාව, ජාතික කමිටුව, දිස්ත්‍රික් කමිටුව වශයෙන් වෙන් වෙන්ව හඳුනාගත යුතුය. ඇමතිවරයා පත් කරන ජාතික කමිටුවේ නිර්දේශය අනුව කොට්ඨාශ ගණන, මායිම්, නම් සහ අංක ද යොදනු ලැබේ. (3 ආ(1) බහු සභික කොට්ඨාශ (වාර්ගික පදනම මත වෙන් විය හැකිය.)නම, අංකය, සහ සභිකයන් ගණන ප්‍රසිද්ධ කරනු ලැබේ.(3 ඇ)

ජාතික කමිටුව විසින් නියම කරන කොට්ඨාශ මායිම් ඇමතිවරයාට අවශ්‍ය නම් වෙනස් කළ හැකිය. ඒ සඳහා පස් දෙනෙකුගේ කමිටුව පත් කරන්නේ ඇමතිවරයාය. ඇමතිගේ තීන්දුවට නීතියෙන් අභියෝග කළ ‍නොහැකියයි දක්වා ඇත.

ජාතික කමිටුවේ ඉහත සඳහන් කාර්යය සඳහා සහභාගීවීමට දිස්ත්‍රික් කමිටුවක් ඇත. දිස්ත්‍රික් ලේකම්වරයා එහි ප්‍රධානියා වන අතර තවත් පස්දෙනෙක් වෙති. මැතිවරණ දෙපාර්තුමේන්තුවේ, පළාත් සභාවේ, මිනුම් දෙපාර්තුමේන්තුවේ, ජන හා සංඛ්‍යාලේඛන දෙපාර්තුමේන්තුවේ නියෝජිතයින් සහ ඇමතිවරයාගේ නියෝජිතයෙකු වශයෙන් හය දෙනෙකි. ජාතික කමිටුවේ අධීක්ෂණය යටතේ මෙම කමිටුව ක්‍රියාත්මක වේ. පළාත් පාලනය පළාත් සභාවට අයත් විෂයකි. එහෙත් ඊට විවිධාකාරයෙන් මෙතෙක් ආණ්ඩුව කළ ඇඟිලි ගැසීම් නිශ්චිතව සඳහන් වන තැනකි මේ. පළාත් සභා නියෝජිතයාට අමතරව ඇමතිවරයාගේ නියෝජිතයෙකු පත් කිරීම මගින් එය තහවුරු වේ. බලය කැටිකර ගැනීමේ භාවිතයන් හා ව්‍යවස්ථා මගින් කළ දේ පළාත් පාලනයේදී මධ්‍යගත කර ගැනීම ඇමතිවරයාට දී ඇති බලතලවලින් පැහැදිලි වේ. (3 ඉ(1))

            ස්ත්‍රී හා තරුණ නියෝජනය          

කලින් ස්ත්‍රී නියෝජනය ගැන විවිධ අදහස් තිබුණ ද 1974 සිට පැවැත් වූ මැතිවරණවල දී ස්ත්‍රී නියෝජනය අනිවාර්ය ප්‍රතිශතයක් නොතිබීමත්, ඒ සඳහා නිසි දිරිගැන්වීමක් නැති නැතිකමත්, නිසා අදත් එය එදා තිබුණු තත්වයේම පවතී. පසුගිය මැතිවරණ වලදී පවා අනිවාර්ය නොවීම නිසා පාර්ලිමේන්තුවේ 5.8. පළාත් සභාවේ 4.1 පළාත් පාලනයේ 1.8 ප්‍රතිශතය මත පවතී. එය 1947 සිට වර්ධනය වී නැත. ඒ අතර තිබුණු ප්‍රමාණයත් අඩුකොට 25% තරුණ හා ස්ත්‍රී නියෝජනය ගැන සඳහන් වේ. එය ද ‍විය හැකිය’ යනුවෙන් දියාරු කොට දැක්විමෙන් එම සංඛ්‍යාව අඩු වුනාට කමක් නැත යන අදහස දී තිබේ.ඊටත් වඩා සැලකිය යුතු කරුණ නම් ‘ස්ත්‍රී හා තරුණ’ එක කණ්ඩායමක් ලෙස දැක්වීමයි. මේ කොටස වෙන වෙනම දේශපාලන නියෝජනය උදෙසා විවෘත ඉඩකඩ තිබීම රටේ කැරලි, ආරවුල්, ආදියට විසඳුමක් වේ. එය නොතකා හැරීම බරපතළ අඩුවකි. (22(4)2 ආ) නාම යෝජනා බාර දෙන විට තරුණ බව ඔප්පු කිරීමට උප්පැන්න සහතිකයේ පිටපතක් හෝ දිවුරුම් සහතිකයක් ඊට ඇමිණිය යුතුය. එසේ නැති විට නාම යෝජනා ලැයිස්තුවම අහෝසි නොවී එම නම පමණක් අහෝසි වෙයි. (25(3)ආ) එම නම වෙනුවට වෙනත් නමක් නොයෙදිය හැකි අතර ඇප මුදල රාජ සන්තක වේ.

           අධික තැන්පත් මුදලක්

මෙතෙක් පළාත් පාලන අපේක්ෂකයා පක්ෂයකින් ඉදිරිපත් වූ විට මුදලක් තැන්පත් කළ යුතු නැත. එහෙත් එය රු. පන්දහසක් කොට ඇත.ස්වාධීන අපේක්ෂකයෙකු තැන්පත් කළ යුතු රු.250ක මුදල රු. විසිදහස දක්වා වැඩි ‍කොට ඇත.මේ මගින් ද සුළු පක්ෂ හා ස්වාධීන අපේක්ෂකයින්ගේ පත්වීම් සීමාවේ. කොලඹ නගර සභාව වැනි ආයතනයකට නාමයෝජනා දීමේ දී ස්වාධීන කණ්ඩායමක් නම් රු.අට ලක්ෂයක් තැන්පත් කළ යුතුය. ඔවුන්ට අ‍නෙක් නීතිවලින් ඇති සීමා නිසා එම තැන්පත් මුදල රාජසන්තක වීම වැළැක්විය නොහැකිය. සභිකයන් ගණන අඩු පළාත් පාලන ආයතනයකට වුවද තරග කොට ජය ගැනීම නිදහස් තරඟකරුවන්ට දුෂ්කර කාර්යකි.

            නාමයෝජනා කාල සීමාව

නාමයෝජනා කාල සීමාව දින 21 නොදී දින එකහමාරකට සීමා කිරීම හොඳ පියවරකි. නාම යෝජනා දීමේ කාලයේ සිට අපේක්ෂකයන් ගැන අධික ප්‍රචාරඝෝෂා අඩු විය හැකිය. එහෙත් පවතින දේශපාලන සංස්කෘතිය අනුව ඉන් පෙරත් ඉන් පසුත් එයම කළ හැකිය. (20 ව) සති 5-6 තුළ නාමයෝජනා දීමෙන් පසු එළඹෙන සෙනසුරාදා දිනයක මැතිවරණය පැවැත්වීමට නීති පැනවීම ද යහපත් පියවරකි. මේ නිසා පාසැල් සහ රජයේ ආයතන පැවැත්වීමට බාධාවක් නොවීමෙන් නාස්තිය අඩුවනු ඇත.  (29 ව)

වත්කම් ප්‍රකාශ කිරීම.                                      

සංශෝධන පනතේ 22(7) අනුව නාම යෝජනා බාර දීමෙන් පසු මාස තුනක් ඇතුලත වත්කම් හා බැරකම් නීතිය (1975/1) යටතේ ප්‍රකාශයක් කළ යුතුය. මෙය වඩාත් සුදුසු වන්නේ නාමයෝජනා දෙන විටම ප්‍රකාශ කිරීම ය. නොයෙක් දේශපාලන වංචා සිදුවන රටක ජයගත් පසු බලයේ සිටින පක්ෂයට කුමක් කළ නොහැකිද? ඒ ඇරත් එසේ ප්‍රකාශ නොකළහොත් සිදුවන්නේ කුමක් දැයි පනත් කෙටුම්පතේ නොදැක්වේ. කලින් මැතිවරණ කොමසාරිස් තුමාගේ නියෝග පරිදි එසේ කළ යුතු වුවද වත්කම් ප්‍රකාශ නොකළ අය බොහෝ වූහ. ප්‍රකාශ කළ අයගේ තොරතුරු මහජනයාට ලබා ගැනීම සඳහා විවෘත නැත. පොතේ තිබෙන නීති ක්‍රියාත්මක නොකරන දේශපාලන භාවිතයන් ඇති නිසා හොඳ ලක්ෂණයක් වුවද වැරදියට භාවිතා කළ හැකිය. (22(7))තනතුරු හා පත්වීම් දීම තහනම්ය.

මෙය ද යහපත් පියවරකි. නාම යෝජනා දිනයේ සිට ඡන්දය දෙනු ලබන දිනයට පසු දින දක්වා ඡන්ද දායකයාට බලපෑමක් ඇති විය හැකි පරිදි රජයේ තනතුරු හා පත්වීම් ලබා නොදිය යුතු බව (60(1)අ) සඳහන් වේ. මේ සඳහා නීතියක් පැනවීමෙන් එය වළකීද? පසුගිය කාලයේ එවැනි පත්වීම් දුන්නේ විධායකයේ අනු දැනුම ඇතිව මැති ඇමතිවරුන් විසිනි. නීතිය තිබියදීම එසේ කළොත් කුමක් කළ හැකිද? කළ යුතුද? යනු සඳහන් නොවේ. සඳහන් කිරීම අවශ්‍ය නැත. නොකර හැරීමට නීතියට ඉහළින් සිටින විධායකය අධිෂ්ඨාන කර ගැනීම සෑහේ. (60(1)ආ) හි සඳහන් පරිදි ඡන්දය දෙන හෝ ගණින අවස්ථාවන්හි දී එම ස්ථානයට ආණ්ඩුවේ හෝ පළාත් සභාවේ ඇමතිවරයෙකු ඇතුළු නොවිය යුතුය.ඡන්දදායකයෙකු වශයෙන් පමණක් ඇතුළු විය හැකිය. එහෙත් එසේ ඇතුළු වුවහොත් එතැන සිටින පොලිස් නිලධාරියා ඔහු අත් අඩංගුවට ගතහොත් හෝ ඡන්ද ස්ථානාධිපති ඔහුට එතැනින් පිටවන ලෙස අණ කළොත් එම නිලධරයන්ට මේ දේශපාලන සංස්කෘතියේ ඇති ආරක්ෂාව කුමක්ද? ඔවුන්ට ඇති එකම ආරක්ෂාව නම් එවැන්නක් සිදු නොවූවා සේ සිටීමය. දැනට සිදුවන්නේ ද එයම‍ය.

            ඡන්දය ගණන් කිරීම                        

ඡන්දය දීම සඳහා හැඳුනුම්පතක් තිබිය යුතුය. මෙතෙක් ජාතික හැඳුනුම්පත් නැති අයට තාවකාලික හැඳුනුම්පත් නිකුත් කිරිමක් හඳුන්වා දි තිබිණ. එය නැවතත් ක්‍රියාත්මක වේ. එසේ තාවකාලික හැඳුනුම්පත් නිකුත් කිරීමේ ඉඩකඩ භාවිතා කොට ඡන්ද දූෂණ සිදු වූ බව පසුගිය මැතිවරණවල දී නිරීක්ෂණය වූ කරුණකි. විශේෂයෙන් එය වතුකරයේ දී විශාල වශයෙන් සිදුවිය.                                                          සංශෝධන පනතේ 7 වන උප ලේඛනයේ සඳහන් පරිදි ඡන්ද දායකයෙකුට ඡන්ද පත්‍රිකාවක් දීම ප්‍රතික්ෂේප කිරීම ගැන පිරවිය යුතු ආකෘති පත්‍රයේ “වලංගු අනන්‍යතා ලේඛනයේ හෝ අනන්‍යතාව තහවුරු නොකිරීම”යනුවෙන් සඳහන් වේ. ඒ අනුව පසුගිය කාලයේ හොර ඡන්ද දැමීමට යොදා ගැනුණු තාවකාලික හැදුනුම් පත ද “වලංගු ලේඛනයක්”බවට පත්වේ. 1973 සිට අවුරුදු 37 ක් ගතවන තුරුත් හැඳුනුම් පත් දීම කර ගත නොහැකි වීම තව දුරටත් එසේ තබා ගැනීම දේශපාලන වාසියක් වි ඇත.

            ඡන්දය ගණන් කිරීම                                    

මෙවර ඡන්දය ගණන් කිරීම සිදු වන්නේ එම ඡන්ද පොලේ දීමය. ඡන්ද ස්ථානාධිපතිවරයාම ඡන්දය ගණන් කිරීමේ නිලධරයා වන්නේය. (39 ව) එම ඡන්ද පොළේ දීම ගණන් කොට ප්‍රතිඵල ප්‍රකාශ කිරීම නිසා ප්‍රතිඵල ඉක්මනින් ලබා ගත හැකි වන අතර තැන තැන සිදුවන කාලගෝට්ටි අඩුවනු ඇත. එහෙත් ප්‍රචණ්ඩ ක්‍රියා බාධකයන් නිසා ගණින ස්ථානය වෙනස් කළ හැකිය. සහකාර තේරීම් භාර නිලධරයා විසින් එසේ වෙනස් කිරීම තීන්දු කරනු ඇත. (40 ව) ගණන් කිරීමේ නියෝජිතයින් වශයෙන් අපේක්ෂකයකු විසින් නියෝජිතයන් දෙදෙනෙකු පත් කළ යුතුය. කලින් මුළු ප්‍රදේශයටම සිටියේ දෙදෙනෙකි. මෙවර කොට්ඨාශයට දෙදෙනෙකි. (41 ව)

කොට්ඨාශයට 70%      සමානුපාතික 30%      

මෙම කෙටුම්පත අනුව වෙන් කරනු ලබන පළාත් පාලන ආයතන ප්‍රදේශයේ සභිකයන් සංඛ්‍යා‍වෙන් 70%කට සමාන කොට්ඨාශවලට එක සභිකයෙකු බැගින් තෝරා ගැනේ. ඒ සඳහා එක් එක් දේශපාලන පක්ෂයෙන් හෝ ස්වාධීන කණ්ඩායමෙන් එක් අපේක්ෂකයෙකු බැගින් නාම යෝජනා පත්‍රයක් භාරදිය යුතුය. අනෙක් 30% කට සමාන අපේක්ෂක සංඛ්‍යාව නම් කොට සමානුපාතික ලැයිස්තුව භාරදිය යුතුය. ජයග්‍රාහී සභිකයන් තෝරා ගැනෙනු‍යේ එම ලැයිස්තු වලිනි. ඡන්ද ප්‍රමාණයට අනුව වැඩිම ඡන්ද ප්‍රමාණයක් ලබා ගත් අපේක්ෂකයා එම කොට්ඨාශයට නම් කරනු ලැබේ. වැඩිම ප්‍රමාණයක් සභිකයන් පත්වන පක්ෂයේ ඡන්ද අනුපාතය අනුව සමානුපාතික සභිකයෝ පත්වෙති. මෙයින් වැඩි වාසි හිමි විය හැක්කේ ප්‍රධාන පක්ෂවලටය. සුළු පක්ෂවලට හා ස්වාධීන කණ්ඩායම්වලට අවාසියක් සිදුවන අවස්ථාවක් ද සමානුපාතික ක්‍රමයේ ඇත. එනම් ඡන්ද විමසීමේදී 5% කට අඩුවෙන් ගත් අයගේ සංඛ්‍යාව මුළු ගණනින් අඩු කිරීමෙන් පසු 5% ට වැඩි එහෙත් පරාජිත සංඛ්‍යාවන් අනුව සමානුපාතික ආසන සංඛ්‍යාව බෙදේ. ප්‍රධාන පක්ෂවල 5%කට අඩුවෙන් ගන්නා අය අඩුවිය හැකිය. එම කොටසට ඇතුලත් විය හැක්කේ සුළු පක්ෂ හා කණ්ඩායම්ය. එහෙයින් ප්‍රධාන පක්ෂවලට ඇති ඉඩකඩ වැඩිය. සුළු පක්ෂ හා කණ්ඩායම් ඉබේම කැපීයාම සිදුවිය හැකිය. එහෙයින් විසම්මුතික දේශපාලනය සීමා වෙයි.

   නගරාධිපති හෝ සභාපති තෝරා ගැනීම                       

ප්‍රධාන  පක්ෂවල ජාතික දේශපාලනය කොට්ඨාශ මට්ටමින් තහවුරු කරන තවත් අවස්ථාවක් ඇත. සමස්ථ ඡන්ද සංඛ්‍යාවෙන් සියයට පනහකට වැඩියෙන් ලබා ගත් අවස්ථාවේදී එම දේශපාලන පක්ෂයේ හෝ ස්වාධීන කණ්ඩායමේ ලේකම්වරයා විසින් එම පළාත්පාලන ආයතනයේ නගරාධිපති හෝ සභාපති තෝරා ගැනේ. සියයට පනහට අඩුවෙන් ඡන්ද ලබා ගත් විට සභාවේ පළමු රැස්වීමේ දී සභිකයන්ගේ ඡන්දයෙන් තෝරා ගනු ලැබේ. ප්‍රධාන දේශපාලන පක්ෂ කොට්ඨාශ මට්ටමින් ඇඟිලි ගැසීම විකල්ප දේශපාලන මත මර්ධනයට යෙදේ.

අයවැය ලේඛනය සම්මත නොවූ විට                     

දැනට පවතින තත්වය අනුව අයවැය ලේඛනය සම්මත නොවූවද සභාපතිට හෝ නගරාධිපතිට පාලනය පවත්වා ගෙන යා හැකිය. එහෙත් අලුත් නීතිය අනුව නගරාධිපති/සභාපති ඉවත් විය යුතුය. මෙය ද ප්‍රජාතන්ත්‍රවාදී ලක්ෂණයකි.             

මෙසේ බලය කැටි කර ගැනීමේ වැඩි අවස්ථා අතර යහපත් යැයි සැලකිය හැකි ලක්ෂණ කීපයක් ද මේ නීතියේ පවතී. එහෙත් ඒ යහපත් ලක්ෂණ වෙන වෙනම ගත් විට එයින් යහපතක් සිදුවිය හැකි ද යන ප්‍රශ්නය පැන නගී. මක් නිසා ද ඕනෑම මැතිවරණයක් පැවැත්වීමට අවශ්‍ය මූලික කරුණු වූ මූල්‍ය පාලනය, පොලීසිය, රජයේ සේවකයන් සහ මැතිවරණ දෙපාර්තුමේන්තුව ඇතුළු සියළු බලතල ජනාධිපති යටතේ පවතී. එවිට අතනින් මෙතනින් පෙන්නුම් කළ හැකි යහපත් කරුණුවලින් ප්‍රජාතන්ත්‍රවාදී පැවැත්ම තහවුරු නොවේ. සමස්තය තනි බලයක් යටතේ තිබෙන විට සිදු නොවිය හැකි වරද කුමක්ද? වරදකට වග කියන්නා කවරෙක්ද?

ප්‍රජාතන්ත්‍රීය අයිතිවාසිකම් රැකගැනීමේ ව්‍යාපාරයේ ප්‍රකාශයක් වන ‘ප්‍රජාතන්ත්‍ර’ පුවත් පතට එහි සංස්කාරක නීතීඥ එස්.ජී. පුංචිහේවා මහතා විසින් ලියන ලද ලිපියක් (2010 නොවැ. කලාප අංක 123) අප ‘අහස් ග‍ඟ’ උපුටා දක්වන්නේ පළාත් පාලන මැතිවරණ සංශෝධන යෝජනා දෙස මැදහත්ව බලා විවේචනාත්මක ලෙස සකසා ඇති මෙම ලිපියේ විෂය අප පාඨකයා දැනුවත් කිරීම පිණිස වන නිසාය.   

                                                           

සටහන

මහින්ද රාජපක්ෂගේ දෙවන ධූරාකාලයේ ආරම්භය නිමිත්තෙන් යළිත් වරක් රට තුළ සැණකෙලි තත්වයක් මතුකර ගැනීමට ආණ්ඩුව වෑයම් කරන බව පැහැදිලිය. මහ පාරේ කිරිබත් කන උදවියට නොවැම්බර් 19 වන දා නැවත වරක් කිරිබත් කැවීමට ආණ්ඩුව කටයුතු යොදනු ඇත. එහෙත් නොවැම්බර් 10 දින රාත්‍රිය පුරා ඇද හැලුනු මහා වර්ෂාව හේතුවෙන් උන් හිටි තැන් අහිමි වූ 40000 කට ආසන්න කොළඹ ජනයා තවමත් සිටින්නේ තාවකාලික රැඳවුම් වාසස්ථාන වලය. එදින හටගත් වැසි වතුර ජල ගැල්ම අන් කවරදාකටත් වඩා කොළඹ නගරයට බලපෑවේය. 65000ක් පැල්පත් වාසීන්ගේ නිවාස පමණක් නොව හෝර්ටන් පෙදෙස, රජමාවත හා කොළඹ 07 ද වතුරෙන් යට විය.

            කොළඹ නගරයට ආශ්චර්යය උදා කිරීම පිණිස තමන් ජීවත් වූ පැල්පත්වලින් නෙරපා හරිනු ලැබූ මිනිසුන්ද, පදික වේදිකාවේ වෙළඳාමෙන් පලවා හරිනු ලැබූ ජනයා ද, පාන් ගෙඩිය හා පොල් ගෙඩිය රු.48 ක් වීම නිසා ඉහළ නැගි ජීවන බර දරාගත නොහැකිව ලතවන තම්කරු ජනයා ද ඇතුළු ‘”සුභ අනාගතයක්” වෙනුවෙන් පාරේ කිරිබත් කෑ මිනිසුන්ගෙන් විශාල පිරිසක් මේ වන විට ආණ්ඩුව කෙරෙහි කලකිරීමට පත්ව සිටින බව ආණ්ඩුව තේරුම් ගෙන සිටී. එහෙත් ඒ පිළිබඳව  එතරම් සැලකිල්ලක් නොදක්වන ආණ්ඩුව දිගින් දිගටම භාවිතා කළ උපාය මාර්ගය වූ ජනතාව ඇන්දවීමේ ක්‍රියා මාර්ගය කෙරෙහිව විශ්වාසය තබා සිටින බව ‍ෙපනේ. එළඹි සතිය මුල නොවැම්බර් 09 දින කැසිනෝ සූදු පොළවල් රට තුළ ව්‍යාප්ත කිරීම සඳහා සූදු විශේෂ විධි විධාන පනතක් සම්මත කර ගත් රජය නොවැම්බර් 19 දින සියළුම රාජ්‍ය ආයතනයන්හි සර්ව රාත්‍රික පරිත්‍රාණ ධර්ම දේශනා පවත්වන ලෙස නියෝග නිකුත් කිරිමෙන් පෙනී යන්නේ ආණ්ඩුව දිගින් දිගටම ජනතාව ඇන්දවීමේ ද්විත්ව රංගනයක යෙදී සිටින බවය. පදවි ප්‍රාප්තිය නිමිත්තෙන් කොළඹ ගොඩනැගිලි විදුලි බුබුලින් නැහැවෙන විට ගිනි කන වැටෙන ජනතාව තමන්ගේ ප්‍රශ්න තාවකාලිකව අමතක කර දමන බව ආණ්ඩුවට විශ්වාසය.

            18 වන ව්‍යවස්ථා සංශෝධනය සම්මත කර දීම සඳහා ආණ්ඩුවට එකතු වූ එ.ජා.ප. මන්ත්‍රීන්ගේ පිහිටෙන් ලබා ගත් තුනෙන් දෙකක බලය ඉතා සාහසික ලෙස තොරොම්බල් කරන රජය රට වියරු ඒකාධිපතිත්වයක් කරා ඇදගෙන යන දරුණු අණ පනත් ගණනාවක් කඩි මුඩියේ සම්මත කර ගත්තේය. කවුරු වටහා නොගත්තත් මහින්ද රාජපක්ෂ ආණ්ඩුව විසින් මෙතෙක් පැවති නියෝජිත ප්‍රජාතන්ත්‍රවාදය හකුළුවා දමා තිබේ. නව ව්‍යවස්ථා සංශෝධනයන් සමඟ රාජ්‍ය සේවාව උඩු යටිකුරු වී ඇති අතර අද රජයේ නිලධාරීන් වගකිව යුත්තේ කැබිනට් මණ්ඩලයට පමණි. විධායක ජනාධිපති බලතල විසින් කැබිනට්ටුව රාජපක්ෂ රෙජිමයේ පුද්ගලයින් කීප ‍ෙදනෙකු විසින් හසුරුවන ආයතනයක් පමණක් බවට පත් කර ඇත. ප්‍රජාතන්ත්‍රවාදී ව්‍යුහය තුළ තිබූ මහජන නියෝජිතයින්ගේ වැදගත්කම අහෝසි වී යමින් පවතී. මහජනයාද, මහජන නියෝජතයින්ද ප්‍රතිපත්ති රාමුවෙන් පිට හුදු අසන්නන් හා දකින්නන් බවට පත් කර තිබේ. ප්‍රජාතන්ත්‍රවාදී සළුපිළිවලින් සැරසූ ආණ්ඩුවේ ඒකාධිපතිත්වය වටහා ගැනීමට ප්‍රජාතන්ත්‍රවාදී බලවේග අසමත් වීම මේ මොහොතේ අප මුහුණ දෙන ප්‍රධාන ගැටලුව වී තිබේ. මේ තීරණාත්මක කඩ ඉම පැනයාමට නම් ප්‍රධාන විපක්ෂ බලවේගයන්ගේ සිට සියලු ප්‍රජාතන්ත්‍රවාදින් එකම රාමුවක පෙළ ගැස්වෙන එකමුතුවක් කරා ගමන් කළ යුතුය. මේ වන විටත් ආණ්ඩුව සමඟ යහන්ගතව සිටින ඇතැම් කොටස් රාජපක්ෂ හෙජමොනියෙන් විතැන් කොට ඔවුන්ගේ හෘද සාක්ෂිය අවදි කළ හැක්කේත් ආණ්ඩුවේ අත්තනෝමතිකත්වය පරාජය කළ හැක්කේත් එවැනි පුළුල් සමාජ ප්‍රජාතන්ත්‍රවාදී එකමුතුවකට පමණි.                 

මෙගා ස්ටාර් අලකලංචිය

පසුගිය දිනක නිමා වූ මෙගාස්ටාර් වැඩ සටහනේ අවසන් රාත්‍රිය අලකලංචියක් වීමත් සමඟ ලංකාවේ මාධ්‍යවල හැසිරීම පිළිබඳව යළිත් කතාබහක් ඇති වී තිබේ. චැනල් බොහෝ ගණනක විකාශය වෙන මෙවැනි රූපවාහිනි වැඩ සටහන් පිළිබඳව කතිකාව ලෙහෙසියෙන් ලිස්සා යැවීම සුදුසු නැත. මන්ද? ස්ටාර්ස්ලා තෝරන නව මාදිලියේ වැඩ සටහන් සමාජයට එල්ල කරන බලපෑම විශාල බැවිනි. වත්මන් ලාංකීය සමාජයේ විශේෂයෙන් අප රට තාරුණ්‍යයේ විවිධ ස්ථර හැසිරවීමට මෙම වැඩ සටහන්වලට දැනටමත් තිබෙන හැකියාව අව තක්සේරු නොකළ යුතු බැවිනි.

            ‘ශ්‍රී ලාංකේය අභිමානය’ යන තේමා පාඨයෙන් තුමූම හඳුන්වා ගන්නා ස්වර්ණවාහිනි චැනලය ඉදිරිපත් කළ මෙගාස්ටාර් සංගීත වැඩ සටහනෙහි ප්‍රධාන භුමිකාව රඟ දක්වන ලද්දේ මර්වින් සිල්වා නම් නියෝජ්‍ය ඇමතිවරයා ය. විනිසුරුවෙකු ලෙස වැඩ සටහනට ඇතුළු වූ මර්වින්ට පැවරී තිබුණේ වැඩ සටහන තුළ ත්‍රාසය, හාස්‍යය හා ලිංගික උත්ප්‍රේරණයන් කුළු ගන්වා පවත්වාගෙන යාම බව පෙනේ. ඔහු එම වගකීම අවසන් රාත්‍රිය දක්වාම මැනවින් ඉටු කළේ ය. අවසානයේ වේදිකාවට හිස් බෝතල් හා බීර ටින් පියඹා ඒම ඇමතිවරයාගේ රංගනයේ කූඨ ප්‍රාප්තිය ලෙස සැලකිය හැකි ය.

 

ස්වර්ණවාහිනිය මෙම නියෝජ්‍ය ඇමතිවරයා මෙගාස්ටාර් විනිශ්චය මණ්ඩලයට සම්බන්ධ කර ගන්නේ සුවිශේෂී හේතුවක් නිසා ය. එම විනිශ්චය මණ්ඩලයේ ක්‍රියාකාරීවීමට අවශ්‍ය අධ්‍යාපනික පරිචයක් හෝ අවම වශයෙන් හික්මීමක්වත් හෝ මෙම නි. ඇමතිවරයාට නැති බව වැඩසටහනේ අධ්‍යක්ෂ බුද්ධික කුලසේකර අපටත් වඩා හොඳින් දැන සිටි‍යේ ය. එහෙත් ඔහුට අවශ්‍ය වූයේ මර්වින් සිල්වා සම්බන්ධ කර ගැනීම තුළින් වැඩ සටහන ජනප්‍රිය කර ගැනීමට අවශ්‍ය කුණු කරවල රසය නිපදවා ගැනීම ය. එසේම අනෙක් අතට ඒ වකවානුවේ ජාතික රූපවාහිනියට කඩා පැන මාධ්‍යවේදියෙකුට පහර දීමත් ඒ සමඟ දිගින් දිගිටම සිදු වු මාධ්‍යවේදින්ට පහර දීම, දැලි පිහියාවලින් කැපීම, වැනි සිදුවීම් රාශියක සැකය ජනතාව විසින් ඇමතිවරයා වෙත එල්ල කිරීමත් හේතුවෙන් ඇති වී තිබූ තත්වය සමහන් කිරීම සඳහා සුදු හුණු ගෑමේ කොන්ත්‍රාත්තුවක් ද ස්වර්ණවාහිනිය භාරගෙන තිබුණි. මේ කරුණු දෙකම අරභයා ස්වර්ණවාහිනිය මර්වින් සිල්වා කේන්ද්‍රිය ලක්ෂ්‍ය වශයෙන් යොදා ගනිමින් මෙගාස්ටාර් වැඩ සටහන ඉදිරියට ගෙන ගියේ ය.

            ඔහු වරෙක චාලි චැප්ලින්ට ඇන්දේය. තවත් විටෙක චොප්පේ බවට පත් වෙමින් විශාරද ෂර්ලි වෛජයන්තට එරෙහිව නැගී සිටිමින් ප්‍රේක්ෂකයන් භීතියට පත් කළේ ය. රංජන් රාමනායකට අභියෝග කරමින් ත්‍රාසජනක ජවනිකා මැව්වේ ය. රුවැති නිළියන් වේදිකාව මත සිටුවා ඔවුන්ගේ මුහුණු රත්පැහැ ගැන්වෙන අයුරින් ඇඟ පසඟ අමුවෙන් වර්ණනා කළේ ය. ජනප්‍රිය නිළියන් වේදිකාව මත නිරුවත් වෙද්දී රසික ප්‍රේක්ෂකයෝ තලු මරමින් ආතල් ගන්නට පුරුදු වූහ. වරක් මේ විනිසුරුවරයා නිළියකගෙන් ඇසුවේ,

            ‘ඔයාගෙ නැටුම අද හරි ලස්සනයි. මට ඉරිසියා හිතෙනවා.’

‘ඔයා ගෙදර මහත්තයා ළඟත් ඔහොම නටනවද?’

‘ගෙදරදි නටන්නේ ඇඳුම් ඇතිවද? නැතිවද? කියල දැන ගන්න ආසයි...කියා ය.

නිවේදක කමල් අද්දරආරච්චිට පැවරී තිබුණේ ලිංගිකත්වය ඉස්මතු වන අයුරින් එය මෙහෙයවීමය. ඔහු එය මැනවින් ඉටු කළේය. වැඩ සටහන ජනප්‍රිය විය. ස්වර්ණවාහිනිය දඹුලුත් ගොස් තලගොයිත් මරා ගත්තේ ය. අපට ප්‍රශ්නයක් වන්නේ මේ සමාජ ගත කරන්නේ ශ්‍රී ලංකාවේ අභිමානය ද? යන්නයි. මෙගාස්ටාර් අවසන් රාත්‍රියේ දී ලක්ෂ සංඛාත දෙස් විදෙස් ප්‍රේක්ෂක සමූහයා සජිවීව නරඹමින් සිටිය දී මර්වින් සිල්වා නියෝජ්‍ය ඇමතිවරයා සුරූපි නිළියක හා මහජන මන්ත්‍රීවරියක ද වන උපේක්ෂා ස්වර්ණමාලිට පැවසුවේ,

            ‘ මට ආසයි කුක්කු බබෙක් වෙලා හරි ඔයාගෙන් කුක්කු ටිකක් බොන්න..’ කියා ය.

ඔහු මෙම වචන පවසද්දී ස්වර්ණවාහිනි අධිපතිනිය ද එහි අධ්‍යක්ෂකවරුන් වන ඇගේ පුතුන් ද ඇමතිවරයාගේ බිරිඳ ද එහි සිටියේ ය. වැඩ සටහන නවතා දැමිය යුතුව තිබුණේ වේදිකාවට සෝමා එදිරිසිංහ මැතිණියට බෝතල් පහර එල්ල වෙද්දී නොව ඇමතිවරයා කුණුහරුප කියූ අවස්ථාවේය.

            මෙවැනි දෙපැත්ත කැපෙන අසභ්‍ය වචන සාමාන්‍ය භාෂාව වශයෙන් යොදා ගන්නා ජන කොටස් කොළඹ නගරයේ බිම් මට්ටමේ වෙසෙන බව අපි දනිමු. සිදු විය යුතුව ඇත්තේ මෙම උප සංස්කෘතික ජන කණ්ඩායම් ශ්‍රී ලාංකේය අභිමානය සහිත මහා සංස්කෘතිය විසින් අවශෝෂණය කර ගැනිම තුළින් යට කී ජන කණ්ඩායම්වල නොදියුණු භාවයන් දිය කර හැරිමයි. එහෙත් මෙම රූපවාහිනි ආයතනය මෙගාස්ටාර් වැඩ සටහන තුළින් වසරකටත් අධික කාලයක් මුළුල්ලේ සිදු කළේ රජයේ නියෝජ්‍ය ඇමතිවරයෙකු යොදා ගනිමින් පාතාල සංස්කෘතියක් අලුත් සළු-පිළි අන්දවා සමාජ ගත කිරීමයි.

            මෙම නියෝජ්‍ය ඇමතිවරයා විසින්ම සමෘද්ධි නිලධාරියෙකු ගස් බැඳ කුප්‍රකට  සිද්ධියේ දී ස්වර්ණවාහිනිය ඔවුන්ගේ සමබර යැයි කියා ගන්නා පුවත් විකාශයේ දී එම ප්‍රවෘත්තිය ඉදිරිපත් කළ ආකාරය ගැන තදබල විවේචන එල්ල වී තිබිණි. එක් පැත්තකින් මර්වින් සිල්වාට නි. ඇමතිවරයාගේ මාධ්‍ය දඩයම සහ අනෙකුත් නොපනත්කම් ක්‍රියා සම්බන්ධව එක්සත් ජාතික පක්ෂ වේදිකාවේ තියුණු හඬක් නැඟූ පාර්ලිමේන්තු මන්ත්‍රී දයාසිරි ජයසේකර මන්ත්‍රීවරයා අනෙක් පැත්තෙන් මෙගාස්ටාර් වේදිකාවට නැඟ තරඟයට සින්දු කියා මර්වින් සිල්වාගේ විනිශ්චය අපේක්ෂාවෙන් සිටගෙන සිටිනු දැකීම ඉතා ජුගුප්සා ජනක දර්ශනයක් විය. ඔහුගේ අවංක අධ්‍යාශය ජනතාව‍ගේ සැකයට භාජනය වූයේ මේ දෙබිඩි රංගනය නිසා ය. අවසන් රාත්‍රියේ දී දයාසිරි ගොඩ නැගූ මාලිගාව ඔහුගේම හිස මත කඩා වැටෙන්නට සැලැස්වීමට ස්වර්ණවාහිනිය කටයුතු යෙදුවේය. කෙසේ වුවද දයාසිරි ජයසේකර මහතාත්, රෝසි සේනානායක මහත්මියත් උකුස්සන් හා පරෙයියන් එකම අත්තේ නොවසන බව දැන්වත් ඉගෙන ගත්තොත් ඔවුන්ගේ ඉදිරි ගමන යහපත් වනු ඇත.

-  කසුප්                    

සටහන

ඉකුත් වසරේ මැයි මාසයේ සිදු වූ ප්‍රභාකරන්ගේ අවසානයත් සමඟ ස්වකීය ප්‍රතිවාදී අනෙකා අහිමි වී යාම නිසා වඩාත්ම අසීරුවට පත්ව සිටින්නේ අන් කවරෙකු හෝ නොව මහින්ද රාජපක්ෂ මහතාගේ ආණ්ඩුව බව ඉතා පැහැදිලියි. බරපතල සමාජ ආර්ථික අර්බුදයකට මුහුණ දී සිටින ආණ්ඩුව ඉකුත් මාස කිහිපය ගත කළේ ජීවන වියදම ඉහලයාම ඇතුළු ජනතා‍වගේ ප්‍රශ්න විසඳුම් සඳහා සංයුක්ත වැඩ පිළිවෙලක් නිර්මාණය කර ගනිමින් නොවේ. එක් පැත්තකින් 18 වන ව්‍යවස්ථා සංශෝධනය ඔස්සේ ව්‍යවස්ථාපිත බලය තව තවත් ශක්තිමත් කර ගත් ආණ්ඩුව අනෙක් පැත්තෙන් අහිමි වූ ප්‍රභාකරන්ට විකල්ප පොදු හතුරා නිර්මාණය කර ගැනීම සඳහා මහත් පරිශ්‍රමයක යෙදී සිටී.

        ජාතික වශයෙන් මෙරට ජනයාට එරෙහි ප්‍රධාන හතුරා ලෙස ජෙනරාල් සරත් ෆොන්සේකා නම් කළ ආණ්ඩුව ඔහුට එරෙහිව උසිගන්වනු ලැබූ මහජන මතයට මුවා වෙමින් මාස දෙක තුනක් ඇද ගන්නට සමත් විය. එම මතවාදය දුර්වල අඩියකට පත් වෙමින් ජෙනරාල් වෙනුවෙන් අනේ අපොයි! කියන තැනට ජනතාව එන විට ආණ්ඩුව කළේ විමල් වීරවංශ ඇමතිවරයා ඉත්තෙකු ලෙස යොදා ගනිමින් U.N.O. ආයතනයේ ප්‍රධාන ලේකම් බැංකි මූන් මහතා ප්‍රධාන හතුරා ලෙස හැඳින්වීමයි. අවසානයේ එම ව්‍යායාමය හාස්‍යජනක විගඩමක් බවට පත් විය.

        ආණ්ඩුවේ ආශ්චර්යය නිසා පීඩාවට පත් ජනයා නගන අ‍ඳෝනාව වෙනතකට යොමු කරවා ගැනීම මේ මොහොතේ අත්‍යවශ්‍ය කාරණාවකි. මෙවර අනෙකා ලෙස නම් කර තිබෙන්නේ විශ්ව විද්‍යාල සිසු පරපුරයි. මර්වින් සිල්වා ඇමතිවරයාගේම අනෙකා ලෙස හැඳින්විය හැකි එස්.බී. දිසානායකට උසස් අධ්‍යාපන අමාත්‍ය ධුරය පිරි නැමූ ආණ්ඩුව සිදු පරපුරට එරෙහිව ඒ මහතා උසි ගන්වා ඇත.

        මේ මොහොතේ ජනතාව කතා කරන්නේ ඉහළ ගිය පාන් ගෙඩියේ පොල් ගෙඩියේ හෝ හාල් කිලෝවේ මිළ ගැන නොවේ. සරසවි සිසුන්ගේ සැහැසිකම් නිසා බිඳ වැටෙනවා යැයි කියන අධ්‍යාපනය ගැන ය. ලබන නොවැම්බරයේ ඉදිරි පත්කළ යුතු අය-වැය හා මැතිවරණයේ දී ජනතාවට පොරොන්දු වූ රු. 2500 යේ වැටුප් වැඩි වීම හෝ අත්‍යවශ්‍ය බඩුවල මිළ සහනය ගැන කිසිවකු කතා කරන්නේ නැත. රාජ්‍ය මාධ්‍ය මෙන්ම ජාතියේ අවාසනාවට අටවා ගත් පුද්ගලික මාධ්‍ය ද අද පැය 24 පුරාම කතා කරන්නේ අන්තරේ ත්‍රස්තයින්ගෙන් ශිෂ්‍ය ව්‍යාපාරය බේරා ගැනීම ගැන ය. සිදු වෙමින් පවතින අභාග්‍ය සම්පන්න යථාර්ථය හඳුනා ගන්නා ලෙසත් මේ මොහොතේ වඩාත්ම අවදියෙන් සිටින බලවේගය වූ සිසු පරපුර ආරක්ෂා කර ගැනීම සඳහාත් ගුරු දෙමාපිය සියල්ලන් නැණ නුවණින් විමසා බැලීම වටී. 

සසර කලකිරිම භා සසර චුන් වීම අතර "මත" වෙනස

එල්.ටී.ටී.ඊ.ය පරාජය කළ දින ජාතිය අමතා කතා කළ ජනපතිතුමා තමාගේ ඊළඟ ත්‍රස්තවාදී මෙහෙයුම ලෙස හැඳින්වූයේ ‘මතට තිත’ සංකල්පයයි. ජාතික හෙළ උරුමය, යහපත පිළිබඳ සිතුවිලි බොහොමයක් අලෙවි කරමින් කරන ලද දේශපාලනයේ ජනප්‍රියම දේශපාලන අලෙවි භාණ්ඩය වුයේ ‘මතට තිත’යි. එය කොතරම් ජනප්‍රිය ලෙස ඔවුන් සමාජ ගත කළා ද කිවතොත් අදට වඩා සමාජය යහපත් ලෙස පැවති, 70 දශකයේ චිත්‍රපටවල දුම්, මත් බීම් හා අසැබි ලෙස හාමුදුරුවරු සැලකූ සෑම රූප රාමුවකටම කොටු දමා ඉවත් කිරීම දක්වාම එය දිගු විය. “අලිංගික යැයි අප හිතන හාමුදුරුවරු” ලිංගික ගිහි ජීවිත පාලනයට දේශපාලනිකව මැදිහත් විය. යහපත්, සිංහල, අමද්‍යප, සුචරිත,  බෞද්ධයෙක් හදා වඩා ගැනීමෙන්, අමද්‍යප එල්.ටී.ටී.ඊ.යේ කුරිරු ත්‍රස්තවාදයට මෙන් අධිරාජ්‍යවාදයටත්එකවිට මුහුණ දීමට අවශ්‍ය සාරය ඒ තුළ ඇති බව දවල් මිගෙල් රෑ දනියෙල් ගිහියන්ගෙන් හා සසර කලකිරී මහණ වූ හාමුදුරුවරුන් වෙතින් පමණක් නොව රු.40,000/ 50,000 'තායි සිල්ක්" සිවුරු පළදින සසර චූන්වු හාමුදුරුවරු විසින් ද දේශනා කොට වදාළ හ. කන්න ඕන වූ විට කබරගොයා තලගොයා නොව තෝර පෙත්තක් තරමටම හඳුන්වා දෙමින් ජනපතිවරණයේ දී ජනපති මැදුරේ දී ජනයාට සංග්‍රහ කළ ‘මධ්‍ය -සාරය’ අනුමත කළ හෙළ උරුමයේ නායක හාමුදුරුවරු ඉන් පිටත, මතට තිත දේශපාලනය ව්‍යාපෘතිය මරාගෙන මැරෙන බෝම්බකරුවන් හා සමාන  ලෙස මැදිහත් වෙමින් ක්‍රියා කළ හ.

           ණය: ණයට පොලී, පොලියට පොලී ගෙවීමට ඇති රජය ඉදිරි සංවර්ධන කටයුතුවලට අදාලවත් යුද්ධයෙන් පසු විදේශ විනිමය ලබා ගත හැකි සංචාරක ව්‍යාපාරයට අවශ්‍ය යටිතල පහසුකම් සැකසීම දැන් අරඹා ඇත. “ලෝකයේ උතුම් රට” අපි, අපිවම හඳුන්වා ගන්නා අර්ථයෙන් ලංකාවට විදේශිකයන් නොපැමිණෙන නිසා පැමිණෙන විදේශිකයන්ගේ විවිධ වුවමනාවන්භා වින්දන සංස්කෘතිය වෙනුවෙන් පරිසරය සකස් කළ යුතුව ඇත. ඒ සඳහා යුද්ධයේ පසු පෙරමුණ හරහා තම දේශපාලන වුවමනාවන් සපුරා ගැනිම සඳහා ගෙන එන ලද මූලධර්මවාදී තහනම්, වර්තමාන ආණ්ඩුවේ එදා වේල වෙනුවෙන් ඉවත් කර ගැනීමක් පසුගිය දින කිහිපය තුළ දැක ගැනීමට සිදු විය. අරක්කු තැබෑරුම් විවෘත කිරීම සඳහා තිබූ තහංචි, පුජනිය ස්ථාන භා පාසැල් දුර සීමාව ඉවත් කිරීමත් රේස් ඔට්ටු සඳහා කලාපයන් වෙන් කිරීමට ‍නීති යෝජනා කිරීමය. දෙවැනි ත්‍රස්තවාදය ලෙස හැඳින් වූ මතට තිත හා සමාජ සාරධර්ම රැකීමේ වුවමනාවේ මන්තරය වෙනුවට මින් පසු, විදේශික සුද්දන්ගේඋවමනාවන්ට ලංකාව තුළ ඉඩකඩ හදා දෙමින් ආණ්ඩු‍‍වේ ඊනියා සංවර්ධන ඉදිරි පෙරමුණ විසින් සන්ධාන අමද්‍යප, අනගාරික, සුචරිත, ධර්ම රාජ්‍යය සාරධර්ම සංකල්ප පෙරටු කොට ගත් පෙරමුණ පසුපසට තල්ලු කර ඇත. ධර්ම රාජ්‍ය වෙනුවට ලිකර් සහ බුකී ප්‍රාදේශීය ලෙස විමධ්‍යගත කර ඇත. දමිළයන්ගේ සංස්කෘතික උවමනා‍වන් සඳහා ප්‍රාදේශීය බලයන් බෙදීමට එරෙහි වූ බෙදීමි පිටරැටින්ගේ සංස්කෘතික වුවමනාවන් සඳහා  බෙදීමට සූදානම්ව ඇත. එභෙත් ලාංකිකයන්ගේ වින්දන සංස්කෘතිය දියුණු කළ 70 දශකයේ චිත්‍රපට අපට තවමත් කොටු දමා බලාගෙන සිටීමට සිදුව ඇත. 70 දශකයේ තරුණ මාලනී ෆොන්සේකාගේ වටොර නොපෙන්වීමට මූලධර්ම බලධාරින් ගත් තීන්දුව දැන්වත් ඉවත් කිරීමට මන්ත්‍රීනී මාලනිගෙන්වත් උපදෙස් ගෙන කටයුතු කළ යුතු ය.

           අපේ රටේ දොර ඇරෙන්නේ විදේශිකයන්ගේ වින්දන සංස්කෘතිය වෙනුවෙන් පමණක් නම් එය ස්වදේශිකයන්ගේ වින්දනයට කරන අසාධාරණයකි.  එසේ නොවුනොහොත් මෙම සන්ධාන ආණ්ඩුව විදේශිය ගැති ආණ්ඩුවක් ලෙස ජාතියේ පංචායුධය වු විමල් වීරවංශ ඇමති විසින් හඳුන්වන දවස වැඩි ඈතක නොවනු ඇත.  

එම්.ඒ. කේ. පෙරේරා                                                                                                                            

වශී ගුරුකම්

කට කහන වට............

නියම නරුමයා නම්, කිසි දෙයක් ගැන විශ්වාසයක් නැතිව සියළු දෙය අවඥා‍වෙන්, උපහාසයෙන් සලකා සියළු ‍දෙයට සිනාසෙන පුද්ගලයා නොව, කොයි දෙය වුවද සිදු කරන්නට බැරි නැතැයි සලකා කිසි දෙයක් ගැන නිශ්චිත විනිශ්චයකට නො එළඹ ඕනෑම දෙයක් සැකයෙන් තොරව ඔප්පු වුවහොත් පමණක් පිළිගැනීමට සූදානමින් සිටින පුද්ගලයා යැයි කතාවක් තිබේ. අප වැටෙන්නේ ඒ දෙවෙනි ගණයට ය. අපට නොතේරෙන පලියට අපි කිසි දෙයක් උපහාසයෙන් සලකා සිනා නොවෙමු.

            

              මේ ටික සඳහන් කළේ මෙකල රූපවාහිනි මාධ්‍යවල දිස්වෙන හා රාජ්‍ය අංශයේ පුවත්පත්වල පවා පත්තර පිටුව පුරා පළවන දැන්වීම් කිපයක් ගැන කියන්නට ප්‍රස්ථාවතාවක් හැටියට ය. හරිගියාම ගාස්තුව ගෙවිය හැකි බව දැක්වෙන අති ප්‍රබල වශී ගුරුකම් ගැනය. මේ දැන්වීම් පල කරන්නේ බුද්ධ පුත්‍රයන් වහන්සේලා විසිනි. මාතර හාමුදුරුවෝ, රුවන් වැල්ලේ හාමුදුරුවෝ, රුප්පාගොඩ හාමුදුරුවෝ ආදී නම් ඇති උන්වහන්සේලා අද මල්වතු අස්ගිරි සංඝ පීතෘන්වහන්සේලා තරමටම මේ ධර්මද්වීපයේ ප්‍රසිද්ධියට පත්ව සිටිති.

            

            මේ භික්ෂූන් වහක්සේලා පෙනී සිටින්නේ මතු ආත්මභාවය යහපත් කිරීම පිණිස නොව මේ ආත්මභාවයේම අත් දුටුවයි යන්න ප්‍රතිඵල ගෙන දෙන කර්ම වෙනුවෙනි. ඒ නිසාම උන්වහන්සේලාට ගිහියන් අතර වැඩි ආකර්ශණයක් දිනා ගැනීමට ද හැකි වී තිබේ. ස්ත්‍රී-පුරුෂ වශී බන්ධන, හැරගිය පෙම්වතා/පෙම්වතිය නැවත ගෙන්වා දීම, පමා වූ විවාහය ඉක්මන් කරවීම, බලාපොරොත්තු පෙම්වතාගේ ආලය ආදරය දිනා දිම, පොරොන්දු කඩ කර මඟ ඇර සිටින අය හදවතට ළං කර දීම. දරුපල අත්කර දීම ආදී ගිහි ජීවිතය යහපත්කර ගැනීමට අත්‍යාවශ්‍ය වැඩ රාශියක් උන්වහන්සේ භාරගෙන තිබේ. ඉරිදා ලංකාදීපයේ පළකර තිබූ එක් දැන්වීමක තිබුණේ ජීවිත කාලයටම වශීකර දීම සඳහා  පෙම්වතියගේ යට ඇඳුමේ නූල් කැබැල්ලක් පමණක්රැගෙන මා හමුවන්න කියා ය.

           

             කුඩා දැරියන් දූෂණය කොට මරා වළලන පුවත් නිතර අසන්නට ලැබෙන රටක, දිනකට ළමුන් තිදෙනෙකු දූෂණයට ලක්වෙන බව පරිවාස හා ළමා ආරක්ෂක දෙපාර්තුමේන්තුවම පවසන රටක, බඩට දරුවන් දී මඟහැර යන මිනිසුන් අනන්තවත් සිටින රටක මේ හාමුදුරුවන් වහන්සේලා සිදු කරන්නේ උතුම් සේවාවක් කරන්නේ යැයි රජය පවා විශ්වාස කරන බව අපට හැ‍‍ඟෙන්නේ රාජ්‍ය මාධ්‍යවල ලැබ ‍තිබෙන අනුග්‍රහය දකින විටය. ධර්මරාජ්‍යය ගොඩනඟන්නට පාරමිතා පෙරහැර ගිය උදවිය අද ආණ්ඩුවේ වගකිව යුතු තැන්වල ඉන්නා නිසා ඒ උදවියගේ අනුග්‍රහය ඇතිව ඉදිරියේ දී මෙම කටයුතු සඳහා රාජ්‍ය ආයතන පවා බිහි වෙන්නට බැරි නැත. කෙසේ වුවද ඒබ්‍රහම් ටී. කොවුර් වැනි අදේව දෘෂ්ටිකයන්, අද ජීවතුන් අතර නැතිවීම මෙම භික්ෂූන් වහන්සේලාට මෙන් ම මේවාට උඩ ගෙඩි දෙන වගකිවයුත්තන්ට ද සැනසිල්ලකි. කාන්තාවන්ගේ යට ඇඳුම්වල නූල් කැබලි ප්‍රසිද්ධ දැන්වීම් දමා එකතු කරන භික්ෂූන් වහන්සේලා පිළිබඳව හෝ උන් වහන්සේලාගේ විනය ගැන බලධරයෝ වගේ වගක් නැතිව සිටිති. මේ අතර ජයවර්ධන පුර සරසවියේ උපකුලපතිවරයා මාධ්‍ය හමුවේ පෙනී සිටිමින් කියා සිටින්නේ ජ’පුර සරසවියේ පැවිදි ශිෂ්‍ය භික්ෂූන් වහන්සේලා සංඝාරාමය තුළ රාත්‍රී කාලයේ අඳනකඩයෙන් පමණක් සිටිනු තමාට අතටම අසු වූ බවය. එපමණක් නොව පිළිකන්නේ හිස් බෝතල් ද තමා දුටු බවය. ඉන් දින කීපයකට පසු ජනාධිපතිවරයා උපකුලපතිවරුන් කැඳවා නියෝග කළේ සරසවිවල විනය නීති අකුරට ක්‍රියාත්මක කළ යුතු බවය. ඒ සමඟම තොර තෝංවියක් නැතිව පැවිදි ශිෂ්‍යයින්ට දෙහි කපන අන්දම මාධ්‍යවල විකාශය විය. අපේ නරුමකමට අපට හිතෙන්නේ මුන් ඔක්කොටම අමු කැවිලා කියා බව කට කහන වට නොකියා සිටිය නොහැක්කේය.   

මෙටි realayයා.        

විශ්ව විද්‍යාල අර්බුදය කවරක්ද?

වර්තමානයේ මතු වී ඇති විශ්ව විද්‍යාල අර්බුදයේ දී ආණ්ඩුව තම වගකීමෙන් මිඳීම සඳහා එම ප්‍රශ්නයේ මුළු ක්‍රියාවම  ජ.වි.පෙ. මතම පැටවීමට කරන උත්සාහයක් දැකිය හැකිවන අතර, උසස් අධ්‍යාපන ඇමතිවරයාගේ උඩඟු ප්‍රකාශනත්, සිසුන් හා සමානවම විශ්ව විද්‍යාල නිසි බලධාරීන්ද  සිසු විරෝධයන්ට දක්වන  අපරිනත ප්‍රතිචාර නිසා උග්‍රවන විශ්ව විද්‍යාල ප්‍රශ්නය විසඳා ගැනීමේ අවම සීමා මට්ටමට වඩා ඉක්මවා යන බවක් දැකිය හැකිය. අධ්‍යාපන ප්‍රශ්නය එහි මූලයන්, ස්වරූපයන්, දිශානතීන් හා පිළිතුරු ගැන විශ්ව විද්‍යාල විද්‍යාර්තීන්ගෙන් අසා දැන ගත් කරුණු ආශ්‍රිතව රාවය පුවත්පතේ 31 ඔක්. 2010 (ඉරිදා) පළවූ සටහනකින් උපුටා ගත් කොටස්වලින් මෙම ලිපිය සකස් වී ඇත.

මේක සංකීර්ණ තත්වයක්.

“....මොනවා වුණත් ආණ්ඩුවට ඕන‍වෙලා තියෙනවා මුහුණට මුහුණ ගැටෙන ගැටුම්කාරී තත්වයක් වර්ධනය කර ගන්න. ඔවුන් ඒ සඳහා පාවිච්චි කරන්නේ නවකවදය වැළැක්වීමේ පනත. මට පේන හැටියට මේ පනත රජය හා රාජ්‍ය විරෝධී තරුණ කොටස් ගැටෙන රඟබිම බවට පත්වීමට ඉඩ තියෙනවා. මොකද ත්‍රස්තවාදය වැළැක්වීමේ පනත තුළින් රජයට ගැටෙන්න දැන් එල්.ටී.ටී.ඊ. එකක් නෑනෙ. ඒ නිසා නවක වදය වැළැක්වීමේ පනත ත්‍රස්තවාදය වැළැක්වීමේ පනතක් විදියට රජය විසින් ප්‍රසාරණය කරන බව තමයි පේන්න තියෙන්නෙ. කණගාටුවට වගේ මේ උගුල ශිෂ්‍යයන් විසින් තේරුම් ගන්න බවක් පේන්නත් නෑ........”

“.....විශ්ව විද්‍යාල ශිෂ්‍යයන්ට සුජාත වූ ප්‍රශ්න කොච්චරක් තියෙනවද? ආර්ථික ප්‍රශ්න, පහසුකම් පිළිබඳ ප්‍රශ්න, අධ්‍යාපන ප්‍රශ්න, සහ සම්පත් හිඟය පිළිබඳ ප්‍රශ්න වගේ ප්‍රශ්න රාශියක් ඒ අතර තියෙනවා. ඒ සුජාත ප්‍රශ්න නිසා තමයි විවිධ බලවේගවලට ශිෂ්‍යයන් මෙහෙයවන්න පුළුවන් වෙලා තියෙන්නෙ. ඒ නිසා ආණ්ඩුව මුලින්ම කරන්න ඕනෙ ඒ ප්‍රශ්න විසඳන එකයි......”

-          ආචාර්ය ලියනගේ අමරකීර්ති.

'සමාජ ප්‍රජාතන්ත්‍රවාදය විසින් මනුෂ්‍යත්වයට යම් ප්‍රමිතියක් අත්කර දීලා තියෙනවා....'

ආරම්භයේ පටන් ම සමාජ ප්‍රජාතන්ත්‍රවාදය තුළ වාමාංශික හා දක්ෂිණාංශික වශයෙන් බෙදීමක් තිබුණා.සරල අර්ථයෙන් සමාජ ප්‍රජාතන්ත්‍රවාදය යනු,

                                       1. නිදහස

                                       2. යුක්තිය

                                       3. සහෝදරත්වය

නිදහස  :-   දේශපාලන නිදහස, සිවිල් නිදහස, ‍පෞද්ගලික නිදහස

යුක්තිය :-   සමානාත්මතාවය ක්‍රියාත්මක කිරීම

                                        1. දේශපාලන සමානාත්මතාවය

                                        2. නීතිය ඉදිරියේ සමානාත්මතාවය

                                        3.  සම්පත් දැරීම, බෙදා හැරීම, භුක්ති විඳීම, 

සහෝදරත්වය :-   මානවයා හැමවිටම සාමූහික සත්වයෙක්.මානවයා ක්‍රියාත්මක කරන්නේ මානව අභිමානය  කියන සංකල්පය. ඒ මානව අභිමානය හා සාමූහිකත්වයට ගරු කරන්න නම් සහෝදරත්වය                       තිබිය යුතුයි. එකිනෙකාගේ ප්‍රශ්න ගැන සංවේදී හා ඒවාට මැදිහත් විය යුතුයි. 

                                      

දාර්ශනික මූලයන් දෙස බැලුවහොත් සමාජ ප්‍රජාතන්ත්‍රවාදය කියන්නෙ නූතනත්වය, (Modernity) කියන වේදිකාවේ ඇති වුන ප්‍රධාන දේශපාලන දර්ශන  තුනෙන් එකක්. ඒ තුන තමයි,

                                          1.  ලිබරල්වාදය

                                          2.  මාක්ස්වාදය

                                          3.  සමාජ ප්‍රජාතන්ත්‍රවාදය

සමාජ ප්‍රජාතන්ත්‍රවාදීන්ට,ආරම්භයේ පටන්ම මාක්ස්වාදය සමඟ තිබුනෙ ඉතා කිට්ටු සම්බන්ධයක්.ඔවුන්, කොමියුනිස්ට් ප්‍රකාශනය දාර්ශනිකව පිළිගන්නවා.නමුත් එය යම් තැනක දි වෙන් වෙනවා.බර්න්ස්ටයින් කියන ජර්මානු සමාජ ප්‍රජාතන්ත්‍රවාදියා සමඟ ඊට පෙර රෝසා ලක්සර්ම්බර්ග්,කෞව්ට්ස්කි රුසියාවේ ප්ලැකනොව් වැනි අය සමාජ ප්‍රජාතන්ත්‍රවාදය ස්ථානගත කළේ කොමියුනිස්ට් ප්‍රකාශනය හරහා. ඒ තුළ තමයි විප්ලවය ගැන කතාබහක් ව‍ගේම බොල්ෂෙවික් ව්‍යාපාරය ගැන සාකච්ඡාව ගෙන ගියෙත්.නමුත් මුල්වරට බර්න්ස්ටයින් කිව්වා,කොමියුනිස්ට් ප්‍රකාශනය කියන්නේ හුදු සදාචාරවාදී ලියවිල්ලක්.ඉන් එහා ප්‍රායෝගිකව බලද්දි නිදහස, යුක්තිය හා සමානාත්මතාවය කියන තැනින් ගොඩනැඟීම් කළ යුතුයි කියල.